ECLAT YABORESHA MAZINGIRA YA KUSOMEA KICHANGANI.

Imetolewa: February 15th, 2025

Taasisi isiyo ya kiserikali nchini Tanzania ECLAT kwa kushirikiana na  Upendo  Association  ya nchini Ujerumani leo tarehe 15.02.2025 wamekabidhi madarasa matatu mapya, matatu yaliyokarabatiwa, matundu 32 ya choo ,16  upande wa wavulana na 16 upande wa wasichana, jiko la muda la kisasa, simtanki 2 zenye ujazo wa lita 5000 kwa kila moja yakiwa yameunganishwa  kuweza kusambaza maji vyooni na jikoni  mradi  uliogharimu  £100,000  mpaka kukamilika.

Mradi huu uliotambulika kwa jina la Kichangani School  Project  pia umewezesha kununuliwa kwa jumla ya  madawati 137, viti vya ofisi 8 pamoja na meza za ofisi 8 vilivyokabidhiwa   kwa Halmashauri ya wilaya ya Morogoro halfa iliyofanyika shule ya msingi Kichangani  kata ya Bwakira juu.

Akipokea makabidhiano hayo Afisa Taaluma  elimu ya msingi Bi Idda Kitwana amewashukuru sana wafadhili hawa  (ECLAT  na Upendo Association) chini ya mwavuli wa FLY AND HELP  iliyofadhiliwa na Christine Nicolai na kuahidi kukuza kiwango cha ufaulu kwa wanafunzi wa Shule ya msingi Kichangani kwani mazingira yameboreshwa na kuwa rafiki kwa kujifunzia.

"Niwaombe wanananchi na wakazi wote wa Kichangani Kisaki kuitumia fursa hii kuwahimiza watoto kusoma kwa bidii na  kuyatunza mazingira  ili yatufae kwa kizazi hiki na kizazi kijacho kwa maendeleo ya   elimu". Amesisitiza Bi. Kitwana.

Aidha amewapongeza na kuwataka wahisani kuendelea kuboresha mazingira ya shule mbalimbali zilizopo ndani ya Halmashauri ya Wilaya ya Morogoro  ikiwa ni pamoja na kuwajengea   nyumba za kuishi waalimu ili kuendelea kuwasaidia  kusogeza huduma bora na za msingi  kwa wananchi na kukuza kiwango cha ufaulu haswa kwa wasichana.