WAZEE WALILIA UADILIFU KWA VIJANA

Imetolewa: October 1st, 2024

Kauli hiyo imetolewa na wazee katika maadhimisho ya siku ya wazee duniani ambayo huadhimishwa kila ifikapo tarehe moja mwezi wa kumi yaliyofanyika katika ukumbi  wa mikutano wa halmashauri ya wilaya ya  Morogoro. 

Wakizungumza katika mkutano huo wazee wamesema, vijana wakiwa kama nguvu kazi ya taifa wanapaswa kuwa waadilifu na wazalendo kwa serikali na jamii kwa ujumla." Baadhi ya vijana wetu wanatukosea sana, hapo mlipo mmefikishwa kwa neema ya Mungu kupitia sisi wazee wenu, tunapoona mnakengeuka  kwa serikali na jamiii tunaumia sana....." Mwenyekiti  wa wazee Christopher Goliana.

Maadhimisho hayo yamekwenda sambamba na utolewaji wa huduma  ya upimaji wa afya bure kwa wazee na ugawaji wa neti zilizotiwa dawa ya kujikinga na ugonjwa wa malaria.

Sambamba na hayo wazee wamepata fursa mbalimbali ya kupata elimu ya lishe, elimu ya usafi na utunzaji mazingira na  haswa utunzaji wa vyanzo vya maji na elimu juu ya uchaguzi wa serikali za mitaa unaotarajiwa kufanyika Novemba 27, 2024.

Mwenyekiti  wa  wazee  Christopher Goliana ameishukuru serikali kwa jitihada inazozifanya kwa wazee hususani  kwenye huduma za afya na kuiomba kuendelea kuboresha huduma hizo ili kuondoa changamoto  ndogondogo zinazojitokeza haswa kwenye upatikanaji wa dawa.

Mgeni rasmi ambaye ni diwani wa kata ya Mvuha mh. Mfaume Chanzi amewapongeza wazee kwa kusherehekea siku ya wazee duniani ambapo wao wameitumia kama fursa ya kukutana na kukaa pamoja kujadili mambo  mbalimbali, kupeana elimu na kujadili changamoto  zinazowakabili na kuangalia namna ya  kuzitatua.

Mh.Chanzi amewaomba wazee kutilia mkazo katika malezi kwa vijana, kwa kufanya hivyo kutasaidia kwa kiwango kikubwa kujenga maadili kwa jamii na kuondoa changamoto za  ukiukwaji  wa maadili kwa jamii ikiwa ni pamoja na vitendo vya ukatili.

Kwa upande wa utolewajiwa elimu ya utunzaji wa vyanzo vya maji hususani mto Mvuha. Afisa mazingira  wa halmashauri  ndugu Joseph Ndunguru amesisitiza kuacha uchafuzi wa maji  ya mto Mvuha ili kuepukana na maradhi yanayoletwa na uchafuzi  wa mazingira  katika vyanzo vya maji.

Akitolea ufafanuzi kuhusu utolewaji wa mikopo kwa wazee, Afisa maendeleo  wa halmashauri  wa wilaya ya Morogoro ndg. Florence Mwambene amesema, serikali inaendelea kuboresha utolewaji wa mikopo hiyo ambapo kuanzia sasa mikopo iliyokuwa imesimama imefunguliwa rasmi hivyo wananachi wenye sifa wanaruhusiwa kuanza kufanya taratibu za kupata mikopo.